සිංහල සහ දමිළ භාෂා වලින් ‘කුප්පි’ යන්නෙන් අරුත් ගැන්වෙන්නේ කුඩා ලාම්පුවකි. ලංකාවේ විශ්ව විද්‍යාල තුළ යම් මාතෘකාවක් අරබයා සිසුන් කණ්ඩායමක වඩා ‘දීප්තිමත්’ සිසුවෙකුගේ මූලිකත්වයෙන් දිගහැරෙන අවිධිමත් සාකච්ඡා හඳුන්වන්නේද ‘කුප්පි’ යන නමෙනි. ‘කුප්පි’ යන්නෙන් අප මෙහිදී අදහස් කරන්නේ අධ්‍යාපනය හා කාර්ය සාධනය සම්බන්ධ දේශපාලනයක් වේ.

2021 මුල් භාගයේ වසංගත තත්වයට ප්‍රතිචාරයක් වශයෙන් රට අගුළුලෑ අවස්ථාවේදී ලංකා අධ්‍යාපනයේ තත්වය ගැන සැළකිලිමත්, අධ්‍යාපන ආයතන වල සේවයෙහි නියුතු පිරිසක් ඒකරාශී වූයේ දේශපාලන, ආර්ථික, සමාජ, අධ්‍යාපනික වශයෙන් වැදගත් කරුණු සම්බන්ධව වඩා පුළුල් සමාජය හා සංවාදයකට එළඹිය හැකි වේදිකාවක් තනාගැනීමටය. සාමූහිකයක් වශයෙන් සමාජ පරිවර්තනයට සහ ප්‍රචණ්ඩත්වයෙන් තොර පරිසරයක් තනාගැනීමට අපි කැප වී සිටිමු. විශේෂයෙන්ම නිදහස් අධ්‍යාපනය පෝෂණය කිරීමත්, ප්‍රධාන දහරාවේ චින්තනය අරක්ගෙන ඇති පටු සහ බෙලහීන කරවන සුළු ජාතිකවාදී චින්තනය ප්‍රශ්න කිරීමත් අපේ උත්සහයයි.